Α΄ Κορινθίους, κεφ. 7 (κείμενον)
Α΄ πρὸς Κορινθίους
ἐπιστολὴ Παύλου
ΚΕΦΑΛΑΙΟΝ 7
[Λόγος 8ος]
1 Περὶ δὲ ὧν ἐγράψατέ μοι, καλὸν ἀνθρώπῳ γυναικὸς μὴ ἅπτεσθαι· 2 διὰ δὲ τὰς πορνείας ἕκαστος τὴν ἑαυτοῦ γυναῖκα ἐχέτω, καὶ ἑκάστη τὸν ἴδιον ἄνδρα ἐχέτω. 3 τῇ γυναικὶ ὁ ἀνὴρ τὴν ὀφειλομένην εὔνοιαν ἀποδιδότω, ὁμοίως δὲ καὶ ἡ γυνὴ τῷ ἀνδρί. 4 ἡ γυνὴ τοῦ ἰδίου σώματος οὐκ ἐξουσιάζει, ἀλλ᾿ ὁ ἀνήρ· 4β ὁμοίως δὲ καὶ ὁ ἀνὴρ τοῦ ἰδίου σώματος οὐκ ἐξουσιάζει, ἀλλ᾿ ἡ γυνή. 5 μὴ ἀποστερεῖτε ἀλλήλους, εἰ μή τι ἂν ἐκ συμφώνου πρὸς καιρόν, 5β ἵνα σχολάζητε τῇ νηστείᾳ καὶ τῇ προσευχῆ· 5γ καὶ πάλιν ἐπὶ τὸ αὐτὸ συνέρχησθε, ἵνα μὴ πειράζῃ ὑμᾶς ὁ σατανᾶς διὰ τὴν ἀκρασίαν ὑμῶν. 6 τοῦτο δὲ λέγω κατὰ συγγνώμην, οὐ κατ᾿ ἐπιταγήν. 7 θέλω γὰρ πάντας ἀνθρώπους εἶναι ὡς καὶ ἐμαυτόν· 7β ἀλλ᾿ ἕκαστος ἴδιον χάρισμα ἔχει ἐκ Θεοῦ, ὃς μὲν οὕτως, ὃς δὲ οὕτως.
8 Λέγω δὲ τοῖς ἀγάμοις καὶ ταῖς χήραις, καλὸν αὐτοῖς ἐστιν ἐὰν μείνωσιν ὡς κἀγώ. 9 εἰ δὲ οὐκ ἐγκρατεύονται, γαμησάτωσαν· κρεῖσσον γάρ ἐστι γαμῆσαι ἢ πυροῦσθαι. 10 τοῖς δὲ γεγαμηκόσι παραγγέλλω, οὐκ ἐγώ, ἀλλ᾿ ὁ Κύριος, γυναῖκα ἀπὸ ἀνδρὸς μὴ χωρισθῆναι· 11 ἐὰν δὲ καὶ χωρισθῇ, μενέτω ἄγαμος ἢ τῷ ἀνδρί καταλλαγήτω· 11β καὶ ἄνδρα γυναῖκα μὴ ἀφιέναι. 12 τοῖς δὲ λοιποῖς ἐγὼ λέγω, οὐχ ὁ Κύριος· 12β εἴ τις ἀδελφὸς γυναῖκα ἔχει ἄπιστον, καὶ αὐτὴ συνευδοκεῖ οἰκεῖν μετ᾿ αὐτοῦ, μὴ ἀφιέτω αὐτήν· 13 καὶ γυνὴ εἴ τις ἔχει ἄνδρα ἄπιστον, καὶ αὐτὸς συνευδοκεῖ οἰκεῖν μετ᾿ αὐτῆς, μὴ ἀφιέτω αὐτόν. 14 ἡγίασται γὰρ ὁ ἀνὴρ ὁ ἄπιστος ἐν τῇ γυναικί, 14β καὶ ἡγίασται ἡ γυνὴ ἡ ἄπιστος ἐν τῷ ἀνδρί· 14γ ἐπεὶ ἄρα τὰ τέκνα ὑμῶν ἀκάθαρτά ἐστι, νῦν δὲ ἅγιά ἐστιν. 15 εἰ δὲ ὁ ἄπιστος χωρίζεται, χωριζέσθω. 15β οὐ δεδούλωται ὁ ἀδελφὸς ἢ ἡ ἀδελφὴ ἐν τοῖς τοιούτοις. 15γ ἐν δὲ εἰρήνῃ κέκληκεν ἡμᾶς ὁ Θεός. 16 τί γὰρ οἶδας, γύναι, εἰ τὸν ἄνδρα σώσεις; 16β ἢ τί οἶδας, ἄνερ, εἰ τὴν γυναῖκα σώσεις;
17 Εἰ μὴ ἑκάστῳ ὡς ἐμέρισεν ὁ Θεός, ἕκαστον ὡς κέκληκεν ὁ Κύριος, οὕτω περιπατείτω. 17β καὶ οὕτως ἐν ταῖς ἐκκλησίαις πάσαις διατάσσομαι. 18 περιτετμημένος τις ἐκλήθη; μὴ ἐπισπάσθω. 18β ἐν ἀκροβυστίᾳ τις ἐκλήθη; μὴ περιτεμνέσθω. 19 ἡ περιτομὴ οὐδέν ἐστι, καὶ ἡ ἀκροβυστία οὐδέν ἐστιν, ἀλλὰ τήρησις ἐντολῶν Θεοῦ. 20 ἕκαστος ἐν τῇ κλήσει ᾗ ἐκλήθη, ἐν ταύτῃ μενέτω. 21 δοῦλος ἐκλήθης; μή σοι μελέτω· 21β ἀλλ᾿ εἰ καὶ δύνασαι ἐλεύθερος γενέσθαι, μᾶλλον χρῆσαι. 22 ὁ γὰρ ἐν Κυρίῳ κληθεὶς δοῦλος ἀπελεύθερος Κυρίου ἐστίν· 22β ὁμοίως καὶ ὁ ἐλεύθερος κληθεὶς δοῦλός ἐστι Χριστοῦ. 23 τιμῆς ἠγοράσθητε· μὴ γίνεσθε δοῦλοι ἀνθρώπων. 24 ἕκαστος ἐν ᾧ ἐκλήθη, ἀδελφοί, ἐν τούτῳ μενέτω παρὰ τῷ Θεῷ.
25 Περὶ δὲ τῶν παρθένων ἐπιταγὴν Κυρίου οὐκ ἔχω, 25β γνώμην δὲ δίδωμι ὡς ἠλεημένος ὑπὸ Κυρίου πιστὸς εἶναι. 26 νομίζω οὖν τοῦτο καλὸν ὑπάρχειν διὰ τὴν ἐνεστῶσαν ἀνάγκην, ὅτι καλὸν ἀνθρώπῳ τὸ οὕτως εἶναι. 27 δέδεσαι γυναικί; μὴ ζήτει λύσιν· 27β λέλυσαι ἀπὸ γυναικός; μὴ ζήτει γυναῖκα· 28 ἐὰν δὲ καὶ γήμῃς, οὐχ ἥμαρτες· καὶ ἐὰν γήμῃ ἡ παρθένος, οὐχ ἥμαρτε· 28β θλῖψιν δὲ τῇ σαρκὶ ἕξουσιν οἱ τοιοῦτοι· ἐγὼ δὲ ὑμῶν φείδομαι. 29 τοῦτο δέ φημι, ἀδελφοί, ὁ καιρὸς συνεσταλμένος τὸ λοιπόν ἐστιν, 29β ἵνα καὶ οἱ ἔχοντες γυναῖκας ὡς μὴ ἔχοντες ὦσι, 30 καὶ οἱ κλαίοντες ὡς μὴ κλαίοντες, καὶ οἱ χαίροντες ὡς μὴ χαίροντες, 30β καὶ οἱ ἀγοράζοντες ὡς μὴ κατέχοντες, 31 καὶ οἱ χρώμενοι τῷ κόσμῳ τούτῳ ὡς μὴ καταχρώμενοι· 31β παράγει γὰρ τὸ σχῆμα τοῦ κόσμου τούτου. 32 θέλω δὲ ὑμᾶς ἀμερίμνους εἶναι. 32β ὁ ἄγαμος μεριμνᾷ τὰ τοῦ Κυρίου, πῶς ἀρέσει τῷ Κυρίῳ· 33 ὁ δὲ γαμήσας μεριμνᾷ τὰ τοῦ κόσμου, πῶς ἀρέσει τῇ γυναικί. 34 μεμέρισται [καὶ] ἡ γυνὴ καὶ ἡ παρθένος. 34β ἡ ἄγαμος μεριμνᾷ τὰ τοῦ Κυρίου, ἵνα ᾖ ἁγία καὶ σώματι καὶ πνεύματι· 34γ ἡ δὲ γαμήσασα μεριμνᾷ τὰ τοῦ κόσμου, πῶς ἀρέσει τῷ ἀνδρί. 35 τοῦτο δὲ πρὸς τὸ ὑμῶν αὐτῶν συμφέρον λέγω, οὐχ ἵνα βρόχον ὑμῖν ἐπιβάλω, 35β ἀλλὰ πρὸς τὸ εὔσχημον καὶ εὐπάρεδρον τῷ Κυρίῳ ἀπερισπάστως.
36 Εἰ δέ τις ἀσχημονεῖν ἐπὶ τὴν παρθένον αὐτοῦ νομίζει, ἐὰν ᾖ ὑπέρακμος, 36β καὶ οὕτως ὀφείλει γίνεσθαι, ὃ θέλει ποιείτω· οὐχ ἁμαρτάνει· γαμείτωσαν. 37 ὃς δὲ ἔστηκεν ἑδραῖος ἐν τῇ καρδίᾳ, μὴ ἔχων ἀνάγκην, ἐξουσίαν δὲ ἔχει περὶ τοῦ ἰδίου θελήματος, 37β καὶ τοῦτο κέκρικεν ἐν τῇ καρδίᾳ αὐτοῦ, τοῦ τηρεῖν τὴν ἑαυτοῦ παρθένον, καλῶς ποιεῖ. 38 ὥστε καὶ ὁ ἐκγαμίζων καλῶς ποιεῖ, ὁ δὲ μὴ ἐκγαμίζων κρεῖσσον ποιεῖ.
39 Γυνὴ δέδεται νόμῳ ἐφ᾿ ὅσον χρόνον ζῇ ὁ ἀνὴρ αὐτῆς· 39β ἐὰν δὲ κοιμηθῇ ὁ ἀνὴρ αὐτῆς, ἐλευθέρα ἐστὶν ᾧ θέλει γαμηθῆναι, μόνον ἐν Κυρίῳ. 40 μακαριωτέρα δέ ἐστιν ἐὰν οὕτω μείνῃ, κατὰ τὴν ἐμὴν γνώμην· 41 δοκῶ δὲ κἀγὼ Πνεῦμα Θεοῦ ἔχειν.
Παραπομπαί
7. 1-2) 7:8,9,26. Μτ 19:10,11.
1) 7:8,26,27,37,38. Μτ 19:10,11. Γεν 20:6. Ρθ 2:9. Πρμ 6:29.
2) 7:9· 6:18. Εφ 5:28,33. 1Τιμ 4:3. Πρμ 5:18,19· 18:22· 19:14. Μλχ 2:14.
3) (1Πετ 3:7). Εξ 21:10.
4) Ωσ 3:3. Μτ 19:9. Μρ 10:11,12.
5) Εξ 19:15. 1Βασ 21:4,5. Ιωηλ 2:16. Ζχ 7:3· 12:12-14. Μτ 19:11. 1Θεσ 3:5.
6) 7:12,25. 2Κορ 8:8· 11:17.
7) 12:11. Πρξ 26:29. Μτ 19:12. 1Κορ 12:11.
8-9) 7:1,2,40. 1Τιμ 5:14. Μτ 5:28.
10-11) 7:12,25,40. Μλχ 2:14. Μτ 5:32· 19:6,9. Μρ 10:11,12. Λκ 16:18.
12) 7:25,40.
13) 7:16.
14) 6:15-17. Ρμ 11:16. 1Τιμ 4:5. Ττ 1:15. Πρξ 10:23. Εσρ 9:1,2. Ησ 52:1. Μλχ 2:15,16.
15) Ρμ 12:18· 14:19.
16) 1Πετ 3:1.
17) 3:5· 4:17· 7:20,24. Ρμ 12:3.
18-19) Γαλ 5:2,6· 6:15. Ρμ 2:25.
20) 7:17,24. Εφ 4:1. Φιλ 1:2,27. Κλσ 1:10. 1Θεσ 2:12.
21) 12:13. Γαλ 3:28. Εφ 6:8.
22) 9:21. Εφ 6:6. Γαλ 5:13. Κλσ 4:1. Φλμ 16. Ρμ 6:16-22. Ιω 8:36. 1Πετ 2:16.
23) 6:20. Γαλ 5:1. Εβρ 9:12. 1Πετ 1:18,19. 2Πετ 2:1.
24) 7:17,20.
25) 7:10,12,40. 1Τιμ 1:12,13.
26) 7:1,8,28. Λκ 21:23.
27) 7:12-14,20.
28) 7:26,36.
29) 1Πετ 4:7. 2Πετ 3:8,9.
29-31) Ιωβ 9:25,26· 14:1,2. 1Κορ 10:11. 1Ιω 2:15-17. Ρμ 8:20,21· 13:11. Λκ 14:26. Μτ 5:18· 10:23.
30) Ψ 29:5· 125:5,6. Εκ 3:4. Ησ 25:8· 30:19. Λκ 6:21,25· 16:25. Ιω 16:22. Απ 7:17; 18:7.
31) Ψ 38:6· 72:20. Εκ 1:4· 2:24,25· 3:12,13· 5:18-20· 9:7-10· 11:2,9,10. Ησ 40:6. 1Κορ 9:18. 1Τιμ 6:17,18. Μτ 24:48-50· 25:14-29. Λκ 12:15-21· 16:1,2· 19:17-26· 21:34. Ιακ 1:10,11· 4:14· 5:1-5. 1Πετ 1:24· 4:7. 1Ιω 2:17.
32-34) 2Κορ 7:1. Εφ 5:25-29. 1Τιμ 5:5. Λκ 14:18-20.
32) Ψ 54:22. Μτ 6:25-34· 13:22. 1Κορ 7:34. Φιλ 4:6. 1Τιμ 5:5.
33) 7:3. 1Θεσ 4:11,12. Εφ 5:25-33. Κλσ 3:19. 1Τιμ 5:8. Λκ 12:22. 1Πετ 3:7. 1Βασ 1:4-8. Νε 5:1-5.
34) 6:20. 2Κορ 7:11,12· 8:16· 11:28. 1Θεσ 5:23. 1Τιμ 3:5. Ττ 3:8. Ρμ 6:13· 12:1,2. Φιλ 1:20. Λκ 2:36,37· 10:40-42.
35) 14:40.
36) 7:27-28,31. 1Τιμ 4:1-4· 5:12.
37) 7:37· 15:58. Κλσ 1:23.
38) 7:1,2,8,26,28,32-34,36-37. Εβρ 13:4.
39) 7:10,15. 2Κορ 6:14-16. Ρμ 7:1-3. Ιω 11:13,14. Γεν 6:2. Δευτ 7:3,4. Μλχ 2:11.
40-41) 7:8,25-28· 2:16. 1Θεσ 4:8.
᾿Εξηγήσεις συμβόλων καὶ στοιχείων