συμβολή

Β΄ πρὸς Θεσσαλονικεῖς

ἐπιστολὴ Παύλου

ΚΕΦΑΛΑΙΟΝ 2

§3

¹ ᾿Ερωτῶμεν δὲ ὑμᾶς, ἀδελφοί, ὑπὲρ τῆς παρουσίας τοῦ Κυρίου ἡμῶν ᾿Ιησοῦ Χριστοῦ καὶ ἡμῶν ἐπισυναγωγῆς ἐπ᾿ αὐτόν, ² εἰς τὸ μὴ ταχέως σαλευθῆναι ὑμᾶς ἀπὸ τοῦ νοὸς μήτε θροεῖσθαι ^2β μήτε διὰ τοῦ πνεύματος μήτε διὰ λόγου μήτε δι᾿ ἐπιστολῆς ὡς δι᾿ ἡμῶν, ^2γ ὡς ὅτι ἐνέστηκεν ἡ ἡμέρα τοῦ Χριστοῦ. ³ μή τις ὑμᾶς ἐξαπατήσῃ κατὰ μηδένα τρόπον· ^3β ὅτι ἐὰν μὴ ἔλθῃ ἡ ἀποστασία πρῶτον καὶ ἀποκαλυφθῇ ὁ ἄνθρωπος τῆς ἁμαρτίας, ⁴ ὁ υἱὸς τῆς ἀπωλείας, ὁ ἀντικείμενος καὶ ὑπεραιρόμενος ἐπὶ πάντα λεγόμενον θεὸν ἢ σέβασμα, ^4β ὥστε αὐτὸν εἰς τὸν ναὸν τοῦ Θεοῦ ὡς θεὸν καθίσαι, ἀποδεικνύντα ἑαυτὸν ὅτι ἐστὶ θεός.

§4

⁵ Οὐ μνημονεύετε ὅτι ἔτι ὢν πρὸς ὑμᾶς ταῦτα ἔλεγον ὑμῖν; ⁶ καὶ νῦν τὸ κατέχον οἴδατε, εἰς τὸ ἀποκαλυφθῆναι αὐτὸν ἐν τῷ ἑαυτοῦ καιρῷ.^{(1) 7} τὸ γὰρ μυστήριον ἤδη ἐνεργεῖται τῆς ἀνομίας, ^7β μόνον ὁ κατέχων ἄρτι ἕως ἐκ μέσου γένηται· ⁸ καὶ τότε ἀποκαλυφθήσεται ὁ ἄνομος, ὃν ὁ Κύριος ἀναλώ­σει τῷ πνεύματι τοῦ στόματος αὐτοῦ ^8β καὶ καταργήσει τῇ ἐπιφανείᾳ τῆς παρουσίας αὐτοῦ· ⁹ οὗ ἐστιν ἡ παρουσία κατ᾿ ἐνέργειαν τοῦ σατανᾶ ἐν πάσῃ δυνάμει καὶ σημείοις καὶ τέρασι ψεύδους ¹⁰ καὶ ἐν πάσῃ ἀπάτῃ τῆς ἀδικίας ἐν τοῖς ἀπολλυμένοις, ^10β ἀνθ᾿ ὧν τὴν ἀγάπην τῆς ἀληθείας οὐκ ἐδέξαντο εἰς τὸ σωθῆναι αὐτούς.^{(2) 11} καὶ διὰ τοῦτο πέμψει αὐτοῖς ὁ Θεὸς ἐνέργειαν πλάνης εἰς τὸ πιστεῦσαι αὐτοὺς τῷ ψεύδει, ¹² ἵνα κριθῶσι πάν­τες οἱ μὴ πιστεύσαντες τῇ ἀληθείᾳ, ἀλλ᾿ εὐδοκήσαντες ἐν τῇ ἀδικίᾳ.

§5

¹³ ῾Ημεῖς δὲ ὀφείλομεν εὐχαριστεῖν τῷ Θεῷ πάντοτε περὶ ὑμῶν, ἀδελ­φοὶ ἠγαπημένοι ὑπὸ Κυρίου, ^13β ὅτι εἵλετο ὑμᾶς ὁ Θεὸς ἀπ᾿ ἀρχῆς εἰς σω­τηρίαν ἐν ἁγιασμῷ Πνεύματος καὶ πίστει ἀληθείας, ¹⁴ εἰς ὃ ἐκάλεσεν ὑμᾶς διὰ τοῦ εὐαγγελίου ἡμῶν εἰς περιποίησιν δόξης τοῦ Κυρίου ἡμῶν ᾿Ιησοῦ Χριστοῦ. ¹⁵ ῎Αρα οὖν, ἀδελφοί, στήκετε, καὶ κρατεῖτε τὰς παραδόσεις ^15β ἃς ἐδιδάχθητε εἴτε διὰ λόγου εἴτε δι᾿ ἐπιστολῆς ἡμῶν. ¹⁶ Αὐτὸς δὲ ὁ Κύρι­ος ἡμῶν ᾿Ιησοῦς Χριστὸς καὶ ὁ Θεὸς καὶ πατὴρ ἡμῶν, ^16β ὁ ἀγαπήσας ἡμᾶς καὶ δοὺς παράκλησιν αἰωνίαν καὶ ἐλπίδα ἀγαθὴν ἐν χάριτι, ¹⁷ παρακαλέ­σαι ὑμῶν τὰς καρδίας καὶ στηρίξαι ὑμᾶς ἐν παντὶ λόγῳ καὶ ἔργῳ ἀγαθῷ.

Παραπομπαί

2. ¹) 1Θεσ 4:1,13-17. Μρ 13:27.

²) 3:17. 1Θεσ 5:2,3. Κλσ 2:18. Εφ 4:14· 5:6. Γαλ 1:6. 1Ιω 4:1. Μτ 24:4,6. Ιερ 29:8.

^2-3) Μτ 24:4,23. 1Τιμ 4:1. Απ 13:11.

^3-4) 7,8. 1Τιμ 1:1. 1Ιω 2:18· 4:1,3. Απ 17:8. Εφ 5:6. Ιω 17:2. Μτ 24:6. — Ησ 14:14. Ιεζ 28:2. Δν 7:25· 11:36,37.

⁵) 1Θεσ 3:4. Πρξ 17:1.

⁶) 7. — Δν 10:13,20.

⁷) 3,4,6. Πρξ 20:29. 1Κορ 5:2.

⁸) 3. Απ 19:15,19,20,21. — Ησ 11:4. Ιωβ 4:9.

^9-10) Δευτ 13:1 κτλ. Δν 8:24. Απ 13:11-14. 2Κορ 2:15· 4:3,4. Εφ 2:2. Ιω 3:19-21· 8:41,44· 17:17. Μτ 24:24.

^11-12) 1Θεσ 2:3. 1Τιμ 4:1. 2Τιμ 4:4. Ρμ 1:18,21,24,32.

^13-14) 1:3. 1Θεσ 1:2-5· 2:12· 5:9. 1Πετ 1:2. Εφ 1:4. Ρμ 8:29. Ιω 17:22.

¹⁵) 3:6. 1Κορ 11:2. Μρ 7:3.

^16-17) 1Θεσ 3:11,13· 5:23. Εβρ 9:12. Γαλ 1:1· 2:20. 2Κορ 13:13. Ιω 3:16.

Σημειώσεις 2ου κεφαλαίου

(1) Β.Α. μετὰ τὴν λέξι καιρῷ ἔχει ἄνω στιγμή.

(2) Β.Α. μετὰ τὴν λέξι αὐτοὺς ἔχει ἄνω στιγμή.

᾿Εξηγήσεις συμβόλων καὶ στοιχείων